Estudios Abertos Ourense
III Edición

Estudios Abertos Ourense naceu para abrir as portas dos espazos nos que as artistas e os artistas da provincia desenvolven a súa práctica. Entrar nun estudio permite achegarse á obra desde o lugar no que nace e ofrece un pracer inigualable e case inconfesable: satisfacer a curiosidade de entrar nun territorio que adoita permanecer fóra do alcance da nosa mirada.

Pero abrir os estudos é tamén activar relacións. Estudios Abertos propón un encontro directo entre artistas, públicos e outros axentes. Por iso, este ano é tamén unha chamada a mirar o Ourense que habitamos e nos rodea cos ollos da arte: a descubrir e poñer en valor as creadoras e creadores da provincia, a visitar as galerías e espazos de arte da cidade, a conectar mundos que adoitan camiñar sen se cruzaren, por máis que apenas haxa distancia entre eles. Porque hai moitas maneiras de relacionarse coa arte e estamos convencidas e convencidos de que, fronte á idea de que a arte contemporánea é algo alleo ou distante, basta prestar un pouco de atención para descubrir que está moito máis cerca de nós do que pensamos.

E entre todas esas relacións queremos este ano poñer en valor unha da que quizá se fala menos: a de quen compra arte. Quen decide convivir cunha obra non é simplemente o último elo dunha transacción, senón un axente activo do ecosistema artístico: escolle, incorpora, conserva e prolonga a vida das obras máis alá do estudio ou da galería. Quizais, se empezamos tamén a contar esas historias, descubramos que comprar arte é algo moito máis próximo do que parece, que pode ir máis contigo do que pensas e que, quen sabe, tal vez poida ser contaxioso.

Porque comprar arte mola.