Mar Ramón Soriano é unha das voces novas máis sólidas da arte contemporánea galega. Nesta terceira edición de Estudios Abertos Ourense abrirá por primeira vez as portas do seu estudio en Niñodaguia, un lugar cunha profunda tradición oleira que conecta tamén coa súa historia familiar e coa súa investigación artística.

Doutora en Belas Artes pola Universidade de Vigo, reside habitualmente en Ourense. A súa traxectoria inclúe estancias e residencias artísticas en Nova York, Marsella, Santiago de Compostela, Alcora, Portugal, Sofía e Córdoba.

Realizou exposicións individuais en espazos como a Galería Nordés da Coruña, Zona C de Santiago de Compostela ou Art Mustang de Elche. Participou tamén en mostras colectivas en institucións como o Centre del Carme Cultura Contemporània de Valencia, o Auditorio de Galicia, o CGAC, o MARCO de Vigo ou a Fundación RAC.

A súa investigación sitúa a materialidade das cousas no centro, explorando as relacións entre obxectos, corpos e espazos a través do peso, a resistencia e a fraxilidade. Traballa especialmente con materiais comúns e cotiáns, que reinterpreta para cuestionar os seus significados e as relacións que establecemos con eles.

A apertura do seu taller permitirá coñecer estes procesos desde o lugar no que se desenvolven e descubrir como a práctica contemporánea de Mar dialoga coa tradición oleira de Niñodaguia, coa memoria familiar e cos materiais vinculados ao territorio.