Expoplanetarium é o estudo compartido por Adriana Pérez e Alfonso Rodríguez, situado no número 27 da céntrica rúa Antonio Puga. Volve abrir as súas portas nesta II edición de Estudios Abertos Ourense como un laboratorio artístico onde conflúen a experimentación plástica, a ilustración, o deseño e a investigación sonora e audiovisual. O seu carácter híbrido e colaborativo convérteo nun punto de encontro para proxectos que circulan entre a cultura underground e a produción artística independente, sempre cun espírito lúdico e crítico.
Ao igual que na pasada edición comparten espazo con Chino Chinovski, Nesta ocasión consolidan o trío, ofrecendo unha proposta que se afasta dos circuítos convencionais para reivindicar o obradoiro como lugar de xogo, resistencia e comunidade. A súa participación achega unha das propostas máis imprevisibles desta edición de Estudios Abertos.
Adriana Pérez
Adriana Pérez é unha creadora multidisciplinar e cofundadora de Expoplanetarium.net. Con formación en Artes Plásticas e Gráfica Publicitaria pola EASD Antonio Faílde de Ourense, Adriana combina a súa actividade como deseñadora gráfica e web en Redeiras.net coa súa participación en proxectos editoriais como Ultragráfico e Saurobuks. O seu traballo destaca pola integración de medios dixitais, videocreacións e escultura, sempre cun enfoque experimental e innovador.
Ao longo da súa carreira, Pérez participou en numerosas exposicións individuais e colectivas, e desenvolveu videocreacións para eventos artísticos e culturais, explorando temas como a identidade, a memoria e a relación entre o humano e a tecnoloxía. A súa obra, fóra das canles comerciais convencionais, reflicte un compromiso coa experimentación e a busca de novas formas de expresión, consolidándose como unha figura clave no espazo creativo de Expoplanetarium.
Alfonso Rodríguez
Alfonso Rodríguez é un artista a tempo completo que explora múltiples formas de expresión, incluíndo a pintura, a colaxe, a fotografía e a poesía, dentro do espazo de Expoplanetarium. Con formación en Artes Plásticas e Gráfica Publicitaria pola EASD Antonio Faílde de Ourense, Alfonso é tamén cofundador de Expoplanetarium.net e da editora Saurobuks. A súa obra caracterízase por unha fusión de estilos e técnicas, onde a liberdade creativa e a exploración de novos formatos son constantes.
Ao longo dos anos, Rodríguez publicou diversos títulos poéticos, participou en múltiples exposicións e desenvolveu proxectos fotográficos e videográficos que reflexionan sobre a cotidianidade e a súa desconstrución. A súa traxectoria inclúe actuacións performáticas e colaboracións con outros artistas, sempre coa intención de romper as barreiras entre as diferentes disciplinas artísticas.
Chinöski
Chinöski é o heterónimo de Juan Antonio Jaén.
Chinöski é quen controla a parte artística e os vicios.
Juan estudou deseño gráfico e ilustración na EASD Antonio Faílde de Ourense, ata que na noite do primeiro aniversario do Rock Club naceu Chinöski. Ambos son pintores, Juan de brocha gorda e Chinöski co pincel.
Chinöski participou nalgunha exposición colectiva e ultimamente en algunhas individuais.
O seu traballo baséase no retrato, co que tenta expresar os seus sentimentos a través das mulleres, esas mulleres que sempre foron o centro da súa vida, xa sexa polas súas ensinanzas, cariño, amor ou descubrimentos.
