Andén 1 é unha asociación cultural situada nunha vella nave do complexo da estación de tren de Ourense, no barrio da Ponte. Fundada en 2014, converteuse nun dos principais focos de actividade cultural, social e reivindicativa da zona, cunha especial vinculación ao entroido, así como ao patrimonio natural, material e inmaterial de Ponte Canedo. Polas súas instalacións teñen pasado colectivos e artistas de diversas disciplinas, e dos seus traballos xurdiron algúns dos máis icónicos referentes do entroido ourensán.

Na súa proposta de feira colectiva, Andén 1 reunirá nesta edición a oito artistas da cidade, cada un cunha linguaxe propia que contribúe á diversidade creativa do espazo. Carmen Rey achega a súa ilustración dixital poética, entre corpo humano e natureza. Gabri Sic constrúe narrativas gráficas críticas e existenciais, tanto en cómic como en ilustración. Luca Log leva a súa traxectoria do graffiti á escultura e pintura, consolidando un estilo cubista contemporáneo. María Pinal Trashorras, licenciada en Belas Artes, traballa entre o figurativo e o abstracto arredor de temas como corpo, alma ou amor. Simón Muñoz Veiga combina tradición académica e influencia xaponesa, transitando entre retrato clásico e manga. Tati Pelo crea universos fantásticos cheos de cores e formas híbridas onde conviven realidade e imaxinación. Uxía Mangana desenvolve unha práctica multidisciplinar, do debuxo á arte textil, cun estilo ecléctico que bebe tanto de influencias occidentais como orientais.

Un panorama plural e vibrante que fai de Andén 1 un punto de encontro clave para a creatividade local.