Andén 1 é unha asociación cultural situada nunha antiga nave do complexo ferroviario de Ourense, no barrio da Ponte e a poucos metros da estación. Fundado en 2014, naceu da necesidade de contar cun espazo aberto á cultura, á reunión e á vida comunitaria, cunha especial vinculación ao Entroido e ao patrimonio material e inmaterial de Ponte Canedo.
Polo seu local pasaron artistas, músicos, escritores, poetas, colectivos sociais e toda clase de persoas con vontade de compartir inquedanzas e proxectos. Durante o resto do ano é obradoiro, escenario, lugar de reunión, zona de vermú e espazo para celebracións; durante Estudios Abertos convértese nun auténtico feirón ecléctico de arte, con sitio para artistas veteranos e novas voces da creación ourensá.
Andén 1 é xa un clásico imprescindible do programa e representa a súa dimensión máis aberta, colectiva e festeira. Nesta edición reúne sete artistas con linguaxes e traxectorias moi diferentes, construíndo un panorama plural da creatividade local.
Carmen Rey
Presenta unha ilustración dixital poética na que conflúen o corpo humano, a natureza e a memoria.
José Antonio Prieto
Explora mediante o óleo e o acrílico a intensidade da cor e da textura, entre o impresionismo e o expresionismo. Luca Log combina escultura, ebanistería, pintura e graffiti, facendo dialogar o rigor do oficio coa liberdade da vangarda.
María Jesús Ballester Rodríguez
Desenvolve unha pintura fresca e cromática, de trazos soltos pero controlados, construída desde a primeira intención.
Moncho Barazeiro
Traballa coa pintura, a escultura e o deseño dixital, mesturando materiais e técnicas para crear obras abertas á interpretación de quen as contempla.
Tati Pelo
Constrúe universos fantásticos cheos de cor e formas híbridas, nos que realidade e imaxinación conviven con naturalidade.
Uxía Mangana
Desenvolve unha práctica multidisciplinar que transita do debuxo á arte téxtil, cunha linguaxe ecléctica alimentada por influencias occidentais e orientais.