Ehlaba Carballo de Dios (Xunqueira de Espadanedo, Ourense, 1960) é unha artista multidisciplinar cunha ampla traxectoria que abrangue exposicións individuais e colectivas, participación en feiras, proxectos de comisariado e publicacións.

Entre as súas mostras individuais con catálogo propio destacan EMET no Museo Ramón María Aller Ulloa de Lalín; Sigo Plantando Árbores na Casa de Galicia en Madrid; e Unha Porta do Rial, en coautoría, no Centro Cultural Marcos Valcárcel (Ourense) e no Museo do Pobo Galego (Santiago). 

A súa obra centra o seu imaxinario na natureza e no territorio, con especial atención ao arquetipo da árbore e ao círculo como conceptos simbólicos. A través deles articula un diálogo entre interioridade e contorno, propoñendo unha mirada poética que conecta identidade, memoria e paisaxe.

A súa casa-estudo, situada no rural ourensán de Xunqueira de Espadanedo, a media hora da cidade e preto do Museo da Olería de Niñodaguia, abre as portas nesta II edición de Estudios Abertos convidando a descubrir unha creación profundamente vinculada ao territorio.