DebuxOu

DebuxOu é un colectivo de artistas que naceu en outubro de 2011 a raíz do primeiro «Sketchcrawl» organizado en Ourense por Isabell Seidel, corresponsal nacional de Urban Sketchers Spain. Esta maratón de debuxo ao aire libre, que se celebra cada tres meses en todo o mundo, reúne debuxantes para plasmar nos cadernos a esencia dos lugares a partir da observación directa.

O colectivo reúne regularmente debuxantes que se xuntan o primeiro sábado de cada mes para practicar o debuxo en localización, seguindo a filosofía de Urban Sketchers: capturar o que se ve a través da observación directa, empregando calquera tipo de medio e respectando os estilos individuais. Ademais, organizan sesións de debuxo con modelo e participan en encontros con outros grupos de Urban Sketchers en Galicia e Portugal.
Durante a súa estancia no local da Asociación de Veciños do Casco Vello, na Rúa da Liberdade en Ourense, DebuxOu funcionará como un estudio Pop-Up, permitindo aos seus membros traballar e expoñer.