A participación de Ramón Conde é unha das grandes novidades desta edición de Estudios Abertos Ourense. Por primeira vez, o artista abrirá as portas do que foi o seu primeiro taller, situado na rúa Xoán de Nóvoa, no centro da cidade, e convertido actualmente nun espazo no que conserva unha mostra moi representativa dos seus cincuenta anos de profesión.

Esta apertura coincide cunha nova etapa persoal e profesional para o escultor, que, despois de desenvolver boa parte da súa carreira fóra da provincia, regresa a Ourense como lugar de vida e de traballo. Mentres prepara un novo taller nunha nave no Pereiro de Aguiar, a apertura do seu primeiro estudio funciona como unha sorte de inauguración simbólica deste regreso: unha oportunidade excepcional para percorrer cinco décadas de creación desde o lugar no que todo comezou.

Ramón Conde é un dos grandes referentes da escultura contemporánea galega. A súa obra, recoñecida dentro e fóra de Galicia e presente en numerosos espazos públicos de distintos países, sitúa a figura humana no centro. A través de anatomías intensificadas e volumes de gran forza expresiva, aborda cuestións relacionadas co corpo, o esforzo, a resistencia e a vulnerabilidade, explorando diferentes dimensións da experiencia individual e da condición humana.