Por primeira vez en Estudios Abertos Ourense teremos a oportunidade de achegarnos a un espazo artístico de especial significación. No lugar de Vilar de Astrés abriremos as portas da Fundación Xaime Quesada Blanco, creada en 2007 para preservar, estudar e difundir o legado artístico de Xaime Quessada Porto e do seu fillo, Xaime Quesada Blanco.
O edificio que hoxe acolle a Fundación foi a casa familiar e o estudio dos dous artistas. Coñecido como Lucenza, o espazo foi concibido e deseñado pola arquitecta María Xesús Blanco Piñeiro, viúva de Quessada e nai de Xaime Quesada Blanco. Arquitectura, vida e creación entrelázanse nun lugar cargado de memoria, rodeado de natureza e intimamente ligado á obra de ambos.
Será, sen dúbida, unha das visitas máis especiais e máxicas desta edición, e teremos a oportunidade de coñecelo da man da propia María Xesús nunha visita que formará parte do roteiro organizado para a tarde do domingo 18, que permitirá achegarnos tamén aos estudios de Xosé Cid e Manuel Buciños e que poderá reservarse proximamente desde esta mesma web.
Xaime Quessada (Ourense, 1937–2007)
Foi un dos nomes fundamentais da renovación da arte galega na segunda metade do século XX. Formado na Escola de Belas Artes de San Fernando de Madrid e posteriormente en París, desenvolveu unha intensa traxectoria internacional, con exposicións en Europa e América. Pintor, gravador, escultor, escenógrafo e escritor, construíu unha obra atravesada polo expresionismo, a experimentación formal e un profundo compromiso social e político. Formou parte do círculo ourensán coñecido como Os Artistiñas e do grupo O Volter.
Xaime Quesada Blanco (Ourense, 1975–2006)
Medrou entre a casa familiar da cidade e Lucenza, onde desde moi novo comezou a interesarse pola pintura. Tras estudar Belas Artes en Pontevedra, continuou a súa formación no estudio do seu pai e de maneira autodidacta. A súa obra evolucionou desde unha figuración de raíz expresionista cara a unha abstracción influída polas vangardas rusas, ampliándose tamén á escultura, ao muralismo, á ilustración e á literatura. A pesar da súa breve traxectoria, desenvolveu unha produción intensa e persoal, acompañada dunha firme implicación ante as inxustizas sociais e políticas do seu tempo.